N’Asturies les castañes mataren muncha fame. Nun vamos a falar de la edá media y les grandes fames, anantes que se semara el maíz y les patates, sinon en tiempos bien cercanos, como nos años 40 y 50 del sieglu XX, les families comín castañes pa almorzar, pa comer y pa cenar. Ermondiaes, en pote con un pucu chorizu y morciella, asaes, corteyoses, corbates, mayuques…y además servín pa dar de comer a los gochos. Tener castañares yera una forma de asegurase el sustentu, yera una riqueza.
Agora, les castañes tan pe los caminos, naide les apaña sinon son los xabalinos. El chancru y la tinta acabaren con munches castañares y les nueves, no tan inxiertes, asina que dan castañes más pequenes, más costoses de apañar y de comercializar. Gúei, pa munchos asturianos y asturianes, les castañes ye daqué que se come nes fiestes del colexu de los rapacinos, cuando facen el magüestu, ya nun quea ni el recuerdu de la importancia que tuvo pa sos güelos. La castaña nun ta en ningún discursu políticu que fale de la recuperación económica, nin se diz cuantu pué aportar al PIB asturianu, porque nun aporta ná, o aporta tan pucu que nun se tien en cuenta.
Per utru llau. les ablanes foren n’Asturies per importantes pa la so economía. En conceyos como Piloña, Llaviana, Casu o Sobrescubiu, casi que yeren les úniques perres que entraben en tol añu. Hasta los años 70 del sieglu pasau, les ablanes vendínse y exportábense
A partir d’esa fecha, entama el declive que va parexu al despoblamientu de les aldees de esos conceyos y que se faz completu al entrar nesti sieglu, de forma que nos pueblos u se vendín anantes les ablanes, agora pisesles al andar por los caminos y son la comía de los esquilos.
Dase la circunstancia que importamos castañes, que consumimos más de les que producimos, y también ablanes. Nel casu de les ablanes, la situación ye tovía más chocante, porque la producción mundial ta concentrá nun situ, en Turquía y una mala cosecha como la d’esti añu, pon en peligru el suministru mundial.
Esta situación ye indicadora de que nun somos coscientes de cómo tan xugando col nuestru sustentu. Los mercaos xueguen col preciu de lo que comemos, sin importa-yos cuanta xente muerre de fame por so culpa. Mientres la xente que muerre sia negro y viva n’Africa, paez que nun importa munchu, pero ¿tamos seguros que nun vamos a ser los siguientes en pasar fame real cuando el precio d’un cereal suba gracies a los especuladores? Si entra el vigor el tratau de llibre comerciu y se entamen a semar transxénicos, perdiendo ya dafechu el control sobre lo que comemos, ¿nun tamos poniendo en manes de unes transnacionales la vida nuestra y la de les nuestres families?. Ye imprescindible, introducir nel discursu social y políticu el conceutu de soberanía alimentaria. Tenemos que ser capaces de producir aquello que comemos.
Sin embargu, vemos que la prensa rexional, y dalgunos políticos, tan glayando pol declive de los pueblos y del mundo rural, día sí y día tamién, echando-y la culpa a los llobos o a que nun dexen a la xente quemar el monte como querien. Ta claro que los llobos nun comen castañes, nin ablanes, y si quemes el monte, quemes les castañares y les ablanares, asina que nun ye por falta de quema que nun sea rentable vender ablanes.
El problema ye del sistema económicu en que tamos metíos. Si miramos la evolución de la población nun conceyu averau a una zona enllena de industria y urbana, como ye Illas, vemos que la pérdida de población y el avieyamientu de la población ye igual o mayor que’n los conceyos de la montaña, como’l citau de Sobrecubiu. Nun son por tanto les figures de proteción, ni la presencia de fauna montés lo que faz que los pueblos ten morriendo ante los nuesos güeyos. Ye la Política Agrícola común, que apoyen el PSOE y el PP la que ta matando el campu asturianu. Ye la especulación financiera co los productos alimenticios.
Nun hay fórmules milagroses pa dar trabayu a tos los paraos y paraes de Asturies, Nun les hay tampucu pa resucitar los pueblos que van queando cá vegada más solos y abandonaos. Si queremos salir del folleru en que tamos metíos, hay que facer munches coses pequenes y nun se pue despreciar ningún tema, ni siquiera ún tan humilde como les castañes, o utru como les ablanes.
Si hubiere una política que se enfotara en producir y comercializar esos productos, asina como una política de fomentu del consumu por la xente moza, frente a otra comida basura munchu peor pa la salú, podríamos dar trabayu a unes decenes de persones nel nuestru país. Con eso fadríamos más resiliente la nuesa economía y taríamos trabayando por la soberanía alimentaria. Nun hay soluciones milagroses, pero soluciones hayles y tan delantre los nuesos güeyos.