LA IDENTIDÁ D’ASTURIES DENDE UNA CONCEPCIÓN ECOPACIFISTA
Puedes ver la versión de este artículo en castellano aquí.
“La nación ye una comunidá política imaxinada. (…)Naide meyor que la nación pa sustituyir a la relixón na formación d’una escatoloxía laica”. A lo último, dambes son “antigües”, pos pretenden perdese nun pasáu inmemorial; “continues”, pos se proxecten nun futuru ilimitáu, terrenal o celeste; y dambes tienen una gran capacidá pa convertir lo contingente en necesariu, utilizando argumentos del tipu: “Ye accidental y envernada que sía francés pero Francia ye necesaria y eterna”.
(Benedict Anderson “Comunidaes Imaxinaes”, 1983)
Hai pallabres que los verdes refugamos dafechu. Asina, conceptos como estáu, patria bandera y nación, asociámoslos nel intre con colonialismu, exércitu, llendes y xenofobia.
Resultáu, ensin dubia, del nuesu niciu llibertariu y d’una concepción universalista y solidaria, tarrecemos los resultados sociales algamaos por sentimientos de «unidá» ya «identidá» como oposición a lo»estremao», a la diversidá que viña los dioses, les llingües, los colores y los moos de vida. El que siente menazada la integridá de los sos rasgos culturales (relixón, llingua y tradiciones son insepartables de les cultures), ensin ser quien a interesase y a amar al empar les «otres cultures», ye tarrén afayadizu pa la intolerancia y el fanatismu.
El nuesu conceptu de la TIERRA como un tou indixebrable ya interrellacionáu fai que sintamos como nueses les ferides del planeta y de los sos habitantes, seyan estos xente, animales o vexetales, y anque tean a milenta kilómetros del nuesu llar.
¿Nacionalismu o universalismu?
Asina, munchos verdes creemos que’l nacionalismu ye un conceptu que l´universalismu camuda en reaccionariu. Mentanto no universal ta inxerío lo llocal y namái tien sentíu dende la diversidá, yá que’l mundu ye sobremanera estremáu, lo llocal surde de la uniformidá y, pa que tenga llóxica tresfórmase en «específico», en «igual» escontra lo «estremao»: falar igual, ser del mesmu color, creer no mesmo…
La idea «nacional» o «nacionalista» remánase na esfera de lo social – en concreto de lo político-social – y, ensin embargu, nun s’afita no ideolóxico-abstracto nin no racional, sinón en sentimientos humanos como l’amistá y el deséu de seguranza escontra lo desconocío. Esto produz moos d’actuar políticos peremocionales y de gran irracionalidá.
La territorialidá y l’apegu a lo más averao ye una característica humana que tienen la mayoría de los animales mal llamaos “superiores”. Quies lo que conoces, lo que t’arrodia, la familia y amigos, los paisaxes que ves cada día. Tamién lo que pues caltriar meyor, lo que te deprendieron los tos padres y güelos y, dende llueu, lo algamao col to esfuerzu.
Sientes más de to lo que ties más cerca y, poro, apañamos afectivamente a la xente, a los animales, a los paisaxes y a les coses que nos arrodien, amás de qu’emponderamos los nuesos vezos y costumes, dándo-yos la categoría de «forma de vida» y tresformándolos en cultura y tradición popular.
Pero, ¿pue facese d’un sentimientu surdíu de lo personal un pensamientu políticu que valga pa lo coleutivo?. Pue ser que si entendemos por «coleutivo» lo restrinxío (o incluso lo «tribal») la respuesta seya afirmativa, pero enxamás si asimilamos lo «coleutivo» a lo «universal», si xulgamos la TIERRA como un tou y al xéneru humanu nel so conxuntu.
¿Qué ye «ser asturianu»?
Conceptu talu, pa min, nun esiste, yá que nun hai nada que te faiga «ser» asturianu. Nin nacer n’Asturies (dalguien nacíu n’Asturies y que viviera tola vida n’otru sitiu pue ser «llegalmente» asturianu pero nun tien porqué sentise lligáu a Asturies o a lo asturiano), nin ser fíu o nietu d’asturianos, nin vivir n’Asturies, caractericen a naide abondamente pa que se sienta asturianu. «Ser asturianu» ye tentar de facer oxetivu un fechu que namái se da no suxetivo: el sentimientu de ser asturianu.
Asturianos sentímonos los qu’amamos la cultura asturiana, los que nos identificamos con una «forma de vida» que más o menos encaxa dientro d’unes tradiciones determinaes, resultáu del influxu d’unes característiques xeográfiques determinaes (na vivienda, vestíu, calzáu, cebera…) y d’unos condicionantes sociales, hestóricos ya económicos (na relixón, mou de gobiernu, trabayu…).
Los que sentimos Asturies y lo asturiano como parte de nós, nun ye, ta claro, por arte de barrabiellu, como tampoco lo ye per imposición nin per heriedu xenéticu.
Nacencia, residencia, aniciu de la familia, convivencia cultural, toos estos fautores y munchos otros influyen en que conozamos y «nos inxertemos» nuna determinada cultura. O, tamién ye posible dafechu, que nos sintamos y “seyamos parte” de delles cultures al empar. El sentise, por exemplu, asturianu y castellanu al mesmu tiempu, ¿quiciabes ye una herexía o namái un frañimientu d’una ortodoxa?.
Por tolo anterior, nun pienso que los verdes tengamos que falar de nacionalismu, sinón, y lo que ye muncho más importante, de cultura.