¿Ye posible una cultura ensin nación? ¿Son posibles toles cultures ensin nenguna nación?
Puedes ver la versión de este artículo en castellano aquí
La cultura enxéndrala la xente y les comunidades, esto ye, los pueblos.
Ensin embargu, los pueblos constitúyense en naciones dende’l momentu en que comparten un mesmu territoriu y son a dase cuenta de que son un cuerpu políticu estremáu. La «concencia nacional» protexe la llingua, la hestoria y les tradiciones comunes y, polo tanto, la cultura autóctona.
Pero la cultura autóctona ye tamién, munches vegaes, variada y tien variantes minoritaries que son torgaes pola «cultura oficial» de la nación. Asina, por exemplu, la oficialidá d’una llingua esixe la so normalización y, poro, el desabeyu y l´arrequexamientu institucional de les variantes y modismos llocales.
El problema de les naciones ye, al mio paecer, la so necesidá de definir les sos diferencies y d’algamar una cohesión interna basada en dellimitar unes «carauterístiques comunes», delles veces imaxinaries. Lo anterior lleva darréu la homoxenización y refundición de les cultures autóctones asina como la escorribanda (por aición o por desdexu) de les cultures foriates (dalgunes d’elles más minoritaries y con más riesgu de desaniciase que la propia cultura que se quier protexer).
Cultures y Naciones
Debemos facenos dos entrugues: ¿Cuántes cultures coexisten n’Asturies? ¿En qué otres naciones ta presente la cultura asturiana?. Podemos escorrer y ser escorridos por dalguién al empar si nun somos quien a iguar la coexistencia ente cultures, esto ye, el respetu a la mestura cultural y al mestizaxe enxendráu por ella.
Creo que realmente pue haber cultures ensin naciones, lo que me paez un fechu mui positivu. Na forma de vida, pautes de comportamientu, ideolóxicamente… ¿parécense más culturalmente, dos asturianos cualesquiera ente sí o un “punki” d’Asturies y un “punki” escocés?. Nun existe nación ensin territoriu pero sí qu’existen cultures ensin territoriu.
A la fin, dende’l nacionalismu defiéndese, enforma, ensin dulda, la cultura autóctona pero tamién, y la hestoria asina nos lo amuesa, dende una agresividá (y, por desgracia, davezu dende la violencia) hacia otres cultures estremaes.
Tendremos que ser quien a defender la nuesa cultura tradicional dende una esfera dafechu pacífica ensin que, por ello, tal defensa seya menos efectiva que la que se fai rabiada y violentamente.
Defensa de la diversidá
Los verdes, dende la non-violencia, tenemos qu’afitar toles cultures de tolos pueblos, incluso de los que nun tienen territoriu, (pensar globalmente) pero, al empar, hemos de defender con toles nueses fuerces el raigañu, les formes de vida tradicionales, los rasgos culturales que sentimos como de nueso de mou individual y tamién los que compartimos coleutivamente naquella comunidá na que teamos conviviendo (facer les coses llocalmente).
El nuesu fin tien de ser universalista: NENGUNA NACIÓN Y UNA ÚNICU PLANETA pero defensor dafechu de la diversidá cultural y de la pluralidá ideolóxica. Ye, poro, que coincidimos en numberoses vindicaciones feches por coleutivos que se definen como nacionalistes y, por tanto, axuntanos con ellos en milenta temes anque seya dende una orientación estremada.
El Nacionalismu como defensa de la cultura
El nacionalismu pue ser positivu na defensa de la cultura tradicional d’un grupu humanu, tamién n’importantes estayes de tipu económicu (puxar pola agricultura y ganadería autóctona, inversiones llocales, empreses con capital y trabayadores pertenecientes a la propia coleutividá), na proteición d’ecosistemes (fauna y flora montesines autóctones, paisaxes protexíos…) y, en xeneral, en tolo que lleva a una mayor descentralización política. Sin embargu, tamién son importantes los sos aspectos negativos, que puen llevar amás al racismu y a la xenofobia.
Les facetes positives del nacionalismu son tamién, munches vegaes, enforma llimitaes. Davezu, descentralízase pa tornar a centralizar nun ámbitu menor, camúdase la bandera pero sigue calteniéndose una bandera nel mástil.
La política verde tien que dir más lloñe, nun nos presten un res los estaos centralistes, nin los exércitos colonialistes, pero sobremanera porque nun nos peten nin los estaos nin los exércitos. Queremos descentralizar, pero algamando un nivel mayor que’l que se podría caltener en nenguna nación, porque la nuesa forma d’atalantar la descentralización y l’autogobiernu faenos duldar sobre la existencia de les llendes. Sofitamos l’autodeterminación, pero non sólo de les «naciones» sinón tamién de les comarques que los nacionalistes vindiquen como «parte inxerida del so territoriu nacional», en resultancia, l’autodeterminación de los pueblos (como individuos y como comunidaes). Nun entendemos, poro, la «soberanía nacional» porque s’asitia penriba de los pueblos y de los individuos, tanto si l’estáu se noma «España» como si se llamara «Asturies».