Una ventana abierta a un prau arboláu. Pumares, nozales, un par de figares y un puñáu más d’especies frutales. Un horru tricentenariu que sigue de pies sobre los sos pegoyos, anque agora remocicáu dempués d’una restauración urxente. Páxaros, pegues, ruiu d’esquilones siéntense lloñe. ¿Bucólicu, pastoril, paradisiacu? Bono, pa daquién como yo, una persona que fue dafechu urbanita por más de cuarenta años, costó avezase. De primeres nun vía namás que folleros, los zapatos siempres puercos, el coche chiscáu de moñica, fruta apodreciendo nun maremágnum de mosques, aviespes y formigues; y, sobremanera, aislamientu.
Nun yera como cuando, viviendo na ciudá, pasaba un fin de selmana en pueblu, o una selmana, quince díes o’l tiempu que fora, voluntariamente y siempres cola fecha de retornu marcada. Circunstancies de la vida fixeron que tuviéramos que volver al pueblu, a la casa familiar, pa curiar d’aquellos que curiaron de nós cuando lo precisamos, siguiendo’l ritual de familia del sur d’Europa, esa que texe redes de solidaridá interxeneracional. Agora yera de verdá, yera pa siguir.
Había muncho por facer, y había qu’entamar por abrir un buecu nuna casa atestada d’hestoria y alcordances de toles persones que la habitaren primeramente. Facese a ritmos y horarios, munches vegaes non coincidentes, compartir espacios, medios y tiempos. Costó pero algamámoslo, abrimos esi buecu, y recibí la primer lleición: los espacios privaos respétense muncho más de lo que pensaba. Costó igualmente, o quiciabes entá más yá que yéramos los invasores, que s’acostumaren y fixeren a nós.
Dempués tocó integrase nel ambiente. Entamamos adulces, pasu ente pasu y a pasinos pequenos. Primero na asociación de vecines, «seliquín non vaya a ser que piensen que lleguen los llistos de la ciudá a aprendenos cómo se faen les coses». Yo, que siempres renegué de les sestaferies, argumentando que si pagaba los mios impuestos nun tenía porqué ocupame de nada, que pa eso taben les brigaes municipales, agora dábame de morros cola realidá, cola necesidá d’autoxestión, de trabayar ente toes por un fin común, entendiendo que la realidá demográfica y xeográfica del mediu rural asturianu, la so
densidá de población y la so distribución megadispersa nun facilita les coses p’algamar el mesmu nivel de servicios que nes ciudaes o villes, si tenemos qu’esperar a que nos lo faiga’l conceyu. Nuna palabra: Solidaridá.
La verdá ye que la integración resultó muncho más fácil de lo que pensaba y agora tocaba dar un pasu más, integrase na vida de la villa. La Capital, esi sitiu qu’enantes paecíame minúsculu y güei súrteme de too lo necesario. De fechu entá nun tuvi nenguna necesidá que nun pudiera cubrir na villa. Bonu, dalguna cosa sí que cayó en dalgún Centru Comercial d’esos qu’arrodien les grandes poblaciones. Nun soi perfectu, nin pretendo selo, y munches vegaes déxome llevar poles hestories de la publicidá y acabo enredáu ente catálogos y folletos, anque reconozo que cada vez menos. Una cosa que sí saqué en claro ye que mercar na villa, nin sale más caru, nin ye peor y xenera actividá económica y social a nivel local. Amás aforres tiempu, estrés y emisiones.
De xacíu qu’hai coses que s’echen en falta de la vida nuna ciudá, pero son principalmente les relatives a les comunicaciones, con trenes con caltenimientu deficiente y pindios de meyores, monopolios de tresporte per carretera, que nos obliguen prácticamente a tirar de coche pa tou; les telecomunicaciones y l’Internet bien deficientes, anque cóbrenlo como si tuvieres viviendo en plena cai Uría d’Uviéu, y el suministru d’agua y saneamientu d’agües residuales, que son más propios de la década de los 60 del sieglu pasáu que del sieglu XXI, y esos son campos qu’hai que batallar.
Pero vuelvo a lo que dicía, integrase na vida de la villa entamaba por empadronase, camudar de médicu, pidir y consiguir plaza nel colexu pal guah.e, AMPA, biblioteca y dalgún otru trámite menor, tou ello solucionáu nun tiempu récord, impensable nuna ciudá. Dexar al neñu xugar na cai col restu de neños y neñes, daqué que pensándolo agora veo imposible de consiguir na ciudá. Cruciase na cai, y saludase, cola maestra del neñu, col dentista, l’alcalde, el carniceru, el taxista,…y non ye namás que los nome pola so ocupación, ye que puedo llamalos pol so nome a toos y cada unu d’ellos pos coincidimos nel día ente día, na vida diaria. Y eso tamién me prestó.
Dempués un pasu más, vas atopando xente venceyáu. Ta claro que nun sitiu pequenu una opción política como EQUO nun lu tien fácil pa constituyir una candidatura propia, poro llegó’l siguiente pasu d’integración, ver qu’ente les distintes afinidaes hai muncho más en común que coses que nos dixebren, por eso nun foi difícil empezar a pensar, y falar, d’una Candidatura d’Unidá Popular. La confluencia esistía, teníemosla na cai, namá faltaba roblala negru sobre blancu. De mientres el procesu esprendime de munchos de los mios prexuicios y purismos. Alderiqué munches vegaes, munches coses, inclusive dalguna vegada llegué a sentime parte de los Monty Python en La Vida de Brian discutiendo si yera meyor el Frente Xudaicu Popular o’l Frente Popular de Xudea.
Eso foi posible precisamente por tener primeramente una integración a nivel social, que foi’l núcleu qu’algamó la integración política. Nun voi tapar qu’hubo problemes, qu’en dalgún momentu’l proyectu tuvo a puntu d’aparcase, o dise definitivamente a pique, pero salió alantre. A la fin la integración foi enorme y amás supunxo una allegría inmensa pa mi veme reconocíu col puestu cabezaleru, daqué que “siendo de fuera” paecíame impensable al presentar la mio candidatura a AGORA NAVA.
Agora muncha xente llámame ecopijo, neorrural. Bono déxo que lladren. Igual sí soi un neorrural d’esos que tán tan en boga pos toi pensando en poner un güertu, n’aprender a utilizar toos esos preseos qu’antes resultabenme exóticos y decorativos, pegame a la tierra y a la so xente, deprender y usar la llingua propia del país. Amás valme pa ratificame nuna creencia que tengo de vieyu, y ye que pa que se dea cualquier tipu d’integración, toles partes tienen de facer un esfuerzu. Lo difícil ye dar ún mesmu el primer pasu.
David Diaz dice
Que artículo más guapo Luis. Nun me atrevo a ponételo en asturiano porque nun controlo yo lo suficiente. Yo que vivo en casa aislada, a 4 km de la ciudad, conozco parte de lo que dices y en cierto modo te envidio. Tamos bien representaos en Nava; y la gente de Nava también.